ଭୁବନେଶ୍ବର, ୨୧।୨: କରୋନାର ନୂଆ ଷ୍ଟ୍ରେନ୍ ଏବେ କେନ୍ଦ୍ର ତଥା ରାଜ୍ୟ ସରକାରଙ୍କ ଚିନ୍ତା ବଢ଼ାଇଛି। ୫ରୁ ଅଧିକ ରାଜ୍ୟରେ ବେକାବୁ ସଂକ୍ରମଣକୁ ନେଇ ଭୟ ସୃଷ୍ଟି ହେଲାଣି। ଏପରିକି ମହାରାଷ୍ଟ୍ରର ଅମରାବତୀ ଓ ଅଚଳପୁରରେ ସପ୍ତାହେ ପାଇଁ ଲକ୍ଡାଉନ୍ ଘୋଷଣା ବି ହେଲାଣି । ତା’ସହ ଦେଶରେ ଦୈନିକ ସଂକ୍ରମଣ ୧୪ ହଜାର ଉପରେ ରହିବା ପରେ ଟେଷ୍ଟିଂ, କଣ୍ଟ୍ରାକ୍ଟ ଟ୍ରେସିଂକୁ ଗୁରୁତ୍ୱ ଦେବାକୁ କହିଛନ୍ତି ଦିଲ୍ଲୀ ଏମସ୍ ମୁଖ୍ୟ। ଆଉ ଏଭଳି ସ୍ଥିତିରେ ଓଡ଼ିଶାରେ କୋକୁଆ ଭୟ ସୃଷ୍ଠି ହେଲାଣି। କରୋନା କଟକଣା କଡ଼ାକଡ଼ି ପାଳନ ପାଇଁ ସବୁ ଜିଲ୍ଲାପାଳ ଓ ଏସ୍ପିଙ୍କୁ ଆଜି ଚିଠି ଲେଖିଛନ୍ତି ଏସ୍ଆରସି। ଏଣେ ସ୍ୱାସ୍ଥ୍ୟ ବିଶେଷଜ୍ଞଙ୍କ ମତ ଜନ ସଚେତନତା ହିଁ କରୋନାର ସବୁଠୁ ବଡ଼ ଅସ୍ତ୍ର।
ମହାରାଷ୍ଟ୍ର ସହ ଅନ୍ୟ କିଛି ରାଜ୍ୟରେ ପୁଣି କୋଭିଡ୍ ପ୍ରଭାବ ପରେ ଓଡ଼ିଶାରେ ବି ପଶିଲାଣି ଛନକା। କଟକଣା କଡ଼ାକଡ଼ି ପାଳନ ପାଇଁ ସବୁ ଜିଲ୍ଲାପାଳ, ପୌରାଞ୍ଚଳ କମିସନର ଓ ଏସ୍ପିଙ୍କୁ ଆଜି ଚିଠି ଲେଖିଛନ୍ତି ସ୍ୱତନ୍ତ୍ର ରିଲିଫ୍ କମିସନର। ଯେଉଁଥିରେ ସର୍ବସାଧାରଣ ସ୍ଥାନ, କର୍ମକ୍ଷେତ୍ର ଓ ଶିକ୍ଷାନୁଷ୍ଠାନରେ ନିୟମ ମାନିବା ସହ ମାସ୍କ ପିନ୍ଧିବା ଓ ସାମାଜିକ ଦୂରତା ପାଳନ ଉପରେ ନଜର ରଖିବାକୁ ନିର୍ଦ୍ଦେଶ ଦିଆଯାଇଛି । ବଜାର, ହାଟ ଓ ଅନ୍ୟ ସ୍ଥାନରେ ମାଇକ ଯୋଗେ ଲୋକଙ୍କୁ ସଚେତନ କରିବାକୁ କୁହାଯାଇଛି। ଶିକ୍ଷାନୁଷ୍ଠାନ ସମେତ ସବୁ ଅଫିସରେ ନିୟମ ପାଳନ ଦାୟିତ୍ୱ ସଂପୃକ୍ତ ଅନୁଷ୍ଠାନ ଓ ଅଫିସ୍ ମୁଖ୍ୟଙ୍କୁ ଦିଆଯାଇଛି। ତେଣେ ଗଣଶିକ୍ଷା ମନ୍ତ୍ରୀ କହିଛନ୍ତି, ଓଡ଼ିଶାରେ ଯଦିଓ କରୋନାର ପୁନଃ ପ୍ରତ୍ୟାବର୍ତ୍ତନ ଭୟାବହତା ନାହିଁ, ତେବେ ଏହାକୁ ହାଲୁକାରେ ନେବା ଉଚିତ୍ ନୁହେଁ । ବିଶେଷ ପରିସ୍ଥିତି ଆସିଲେ ସ୍କୁଲ ବନ୍ଦ କିମ୍ବା ଲକ୍ଡାଉନ୍ କଥା ବି ଚିନ୍ତା କରାଯିବ।
ତେବେ କେରଳ, ମହାରାଷ୍ଟ୍ର, ପଞ୍ଜାବ, ମଧ୍ୟପ୍ରଦେଶ ଓ ଛତିଶଗଡ଼ରେ ଦ୍ରୁତଗତିରେ ବଢୁଥିବା କରୋନା ସଂକ୍ରମଣ ଓ ୨୪୦ ନୂଆ ଷ୍ଟ୍ରେନ୍ ଚିହ୍ନଟ ପରେ ବଢ଼ିଛି କେନ୍ଦ୍ର ସରକାରଙ୍କ ଚିନ୍ତା । ବର୍ତ୍ତମାନ ସମୟରେ ଟେଷ୍ଟିଂ, କଣ୍ଟାକ୍ଟ ଟ୍ରେସିଂ ଓ ଆଇସୋଲେସନ ଉପରେ ଅଧିକ ଗୁରୁତ୍ୱ ଦେବାକୁ ପଡିବ ବୋଲି କହିଛନ୍ତି ଦିଲ୍ଲୀ ଏମ୍ସ୍ ମୁଖ୍ୟ ଡାକ୍ତର ରଣଦୀପ ଗୁଲେରିଆ। ଏଣେ ଓଡ଼ିଶାରେ ବି ସତର୍କତାକୁ ପ୍ରାଧାନ୍ୟ ଦେବାକୁ ଚେତାଇଲେଣି ସ୍ୱାସ୍ଥ୍ୟ ବିଶେଷଜ୍ଞ । କହିଛନ୍ତି ନୂଆ ଷ୍ଟ୍ରେନ ଶୀଘ୍ର ବ୍ୟାପୁଛି । ତେଣୁ ପୂର୍ବଭଳି ସାମାଜିକ ଦୂରତ୍ୱ, ମାସ୍କ ପରିଧାନ ଓ ବାରମ୍ବାର ହାତ ଧୁଆକୁ ହିଁ ଅସ୍ତ୍ର କରିବା ସହ ଟିକାକରଣ ବଢ଼ାଇବାକୁ ପଡ଼ିବ।
