ଭୁବନେଶ୍ବର, ୫।୬: ସ୍ୱାସ୍ଥ୍ୟ ମନ୍ତ୍ରୀ ନବ ଦାସଙ୍କ ହତ୍ୟା ଏକ ବଡ଼ ଷଡ଼ଯନ୍ତ୍ରର ପରିଣାମ ବୋଲି କୁହାଯାଉଥିବା ବେଳେ ଏହି ସନ୍ଦେହକୁ ଆହୁରି ଦୃଢ଼ୀଭୂତ କରୁଛି କ୍ରାଇମବ୍ରାଞ୍ଚର ତଦନ୍ତ ପ୍ରକ୍ରିୟା। କ୍ରାଇମବ୍ରାଞ୍ଚର ତଦନ୍ତ ପ୍ରକ୍ରିୟାକୁ ବିଭିନ୍ନ ବର୍ଗରୁ ସମାଲୋଚନା କରାଯାଉଥିବା ବେଳେ ଏଥିରେ ସାମିଲ ହୋଇଛନ୍ତି କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ। ଏହି ଘଟଣାରେ ଯେଉଁ ତଦନ୍ତ ଚାଲିଛି, ତା’ର ମୂଳଦୁଆ ହିଁ ଠିକ୍ ନାହିଁ ବୋଲି ସେ କହିଛନ୍ତି।
ଶ୍ରୀ ପ୍ରଧାନ କହିଛନ୍ତି, ପୁଲିସ୍ ବିଭାଗର ଜଣେ ଏଏସ୍ଆଇସ୍ତରର କର୍ମଚାରୀ ସ୍ପଷ୍ଟ ଦିବାଲୋକରେ ସରକାରୀ ବନ୍ଧୁକରୁ ଗୁଳି କରି ଜଣେ କ୍ୟାବିନେଟ୍ ମନ୍ତ୍ରୀଙ୍କୁ ହତ୍ୟା କଲେ। ନୈତିକତା ତଥା ନ୍ୟାୟ ଦୃଷ୍ଟିରୁ ସରକାର ଏହାର ତଦନ୍ତ ଭାର ତୃତୀୟ ପକ୍ଷକୁ ହସ୍ତାନ୍ତର କରିବାକୁ ବିଚାର କରିବା କ’ଣ ଠିକ୍ ହୋଇ ନଥା’ନ୍ତା? ସରକାର ଏହି ଘଟଣାର ତଦନ୍ତକୁ ନେଇ ଆଦୌ ଗମ୍ଭୀର ନାହାନ୍ତି। ଯଦି ସରକାର ଗମ୍ଭୀର ଥାଆନ୍ତେ, ତା’ହେଲେ ତଦନ୍ତ ପ୍ରକ୍ରିୟାକୁ ତଦାରଖ କରିବାକୁ ଜଣେ ସିଟିଂ ଜଜ୍ଙ୍କୁ ନିଯୁକ୍ତ କରିବାକୁ ଅନୁରୋଧ କରିଥା’ନ୍ତେ। ଯେତେବେଳେ ସରକାର ତଦନ୍ତ ପ୍ରକ୍ରିୟା ତଦାରଖ କରିବା ପାଇଁ ହାଇକୋର୍ଟଙ୍କୁ ଚିଠି ଲେଖିଲେ, ସେଥିରେ ଜଣେ ସିଟିଂ ଜଜ୍ଙ୍କୁ ଦାୟିତ୍ୱ ଦେଲେ ମଧ୍ୟ ହେବ ବୋଲି କହିଥିଲେ। ଯଦି ସରକାର ଗମ୍ଭୀର ଥାଆନ୍ତେ କେବଳ ହାଇକୋର୍ଟର ଜଣେ ସିଟିଂ ଜଜ୍ଙ୍କୁ ଦାୟିତ୍ୱ ଦେବାକୁ ଲେଖିଥା’ନ୍ତେ।
ସେହିପରି ଏହି ହତ୍ୟାକାଣ୍ଡର ତଦନ୍ତକୁ ଜଣେ ଅବସରପ୍ରାପ୍ତ ବିଚାରପତି ତଦାରଖ କରୁଥିବା ବେଳେ ତାଙ୍କ ନିଯୁକ୍ତିକୁ ନେଇ ପ୍ରଶ୍ନ ଉଠାଇଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ। ସେ କହିଛନ୍ତି, କମିସନ ଆକ୍ଟ ଅନୁସାରେ ତାଙ୍କୁ ନିଯୁକ୍ତ କରାଯାଇ ନାହିଁ। ତାଙ୍କର ଅଧିକାର ବିଷୟରେ କିଛି ସ୍ପଷ୍ଟ କରାଯାଇନାହିଁ।
ଏହା ସହିତ ରାଜ୍ୟର ଆଇନଶୃଙ୍ଖଳା ପରିସ୍ଥିତି ଉପରେ ପ୍ରଶ୍ନ ଉଠାଇଛନ୍ତି ଧର୍ମେନ୍ଦ୍ର। ନବ ଦାସ ହତ୍ୟାକାଣ୍ଡର ସତ ଜଗନ୍ନାଥଙ୍କୁ ଜଣା ବୋଲି ଡିଜିପି କହିବା ଓ ଗୃହବିଭାଗର ଦାୟିତ୍ୱରେ ଥାଇ ମୁଖ୍ୟମନ୍ତ୍ରୀ ନିରବତା ଅବଲମ୍ବନ କରିବା, ରାଜ୍ୟର ଆଇନଶୃଙ୍ଖଳା ଅବସ୍ଥା କ’ଣ ତାହା ବୁଝାପଡ଼ୁଛି ବୋଲି କେନ୍ଦ୍ର ମନ୍ତ୍ରୀ କହିଛନ୍ତି। ରାଜ୍ୟରେ ପୁଲିସ୍ ତା’ ମୂଳ କାମ କରୁ ନଥିବା ସେ ଅଭିଯୋଗ କରିବା ସହିତ ରାଜ୍ୟକୁ ପ୍ରକୃତରେ କିଏ ଶାସନ କରୁଛି, ତାହା ପ୍ରତିଦିନ ଆସୁଥିବା ଭିଡିଓରୁ ସ୍ପଷ୍ଟ ହେଉଛି ବୋଲି କେନ୍ଦ୍ର ମନ୍ତ୍ରୀ ଶ୍ରୀ ପ୍ରଧାନ କହିଛନ୍ତି।
Comments are closed.