ନୂଆଦିଲ୍ଲୀ, ୭।୬: ପାଖାପାଖି ୫ ମାସ ହେବ ସେନାରେ ସିଡିଏସ୍ ପଦବି ଖାଲି ରହିଛି। ଆଉ ଏହି ନୂତନ ନିଯୁକ୍ତି ପାଇଁ ଆଜି ନିୟମରେ କିଛି ପରିବର୍ତ୍ତନ ହୋଇଛି। ପ୍ରତିରକ୍ଷା ମନ୍ତ୍ରାଳୟ ନିୟମ ସଂଶୋଧନ ପାଇଁ ମଙ୍ଗଳବାର ଏକ ବିଜ୍ଞପ୍ତି ଜାରି କରିଛି। ନୂତନ ଗାଇଡଲାଇନ ଅନୁଯାୟୀ, ଯେଉଁମାନେ ଲେଫ୍ଟନାଣ୍ଟ ଜେନେରାଲ କିମ୍ବା ଜେନେରାଲ ପଦରୁ ଅବସର ନେଇଛନ୍ତି, କିନ୍ତୁ ନିଯୁକ୍ତି ତାରିଖ ସୁଦ୍ଧା ସେମାନଙ୍କର ବୟସ ୬୨ ବର୍ଷରୁ କମ୍, ତେବେ ଏହିପରି ବ୍ୟକ୍ତିମାନେ ସିଡିଏସ୍ ପଦବୀ ପାଇଁ ଯୋଗ୍ୟ ବିବେଚିତ ହେବେ। ଏପରି ସ୍ଥଳେ ମନ୍ତ୍ରାଳୟ ମଧ୍ୟ ସେମାନଙ୍କ ନାମ ଉପରେ ବିଚାର କରିବ। ସୂଚନାଥାଉ କି, ଯେ ସିଡିଏସ୍ ପଦବୀ ପାଇଁ ୱାର୍କିଂ ଲେଫ୍ଟନାଣ୍ଟ ଜେନେରାଲ୍ କିମ୍ବା ଜେନେରାଲ୍ ସମକକ୍ଷ ନାମ ମଧ୍ୟ ବିଚାରକୁ ନିଆଯିବ।
ଏହା ସହିତ ସେନା ଅଧିସୂଚନା ବା ଆର୍ମି ଆକ୍ଟ ୧୯୫୦ ଏବଂ ନୌସେନା ଆକ୍ଟ ୧୯୫୭ ଅଧୀନରେ ଆଉ ଏକ ନୂତନ ବିଜ୍ଞପ୍ତି ମଧ୍ୟ ଜାରି କରାଯାଇଛି । ଏହି ବିଜ୍ଞପ୍ତି ଅନୁଯାୟୀ, ତିନିଜଣ ସେନାଧ୍ୟକ୍ଷଙ୍କ କାର୍ଯ୍ୟକାଳ ତିନିବର୍ଷର ସେବା କିମ୍ବା ଯେତେବେଳେ ସେମାନେ ୬୨ ବର୍ଷ ବୟସ ହୋଇଯିବେ, ଯାହା ପୂର୍ବରୁ ରହିଥାଏ । ଏପରି ପରିସ୍ଥିତିରେ, ସିଡିଏସ୍ ପଦ ପାଇଁ ଅବସରପ୍ରାପ୍ତ ସେନା ମୁଖ୍ୟଙ୍କ ନାମ ପଠାଇବା ଟିକେ କଷ୍ଟକର ହେବ । କାରଣ ସାଧାରଣତ ଏହିପରି ବ୍ୟକ୍ତିମାନେ ସିଡିଏସ୍ ପଦବୀରେ ପହଞ୍ଚିବା ବେଳକୁ ୬୨ ବର୍ଷ ବୟସ ହୋଇଥାନ୍ତି ।
ତେବେ ଜେନେରାଲ ବିପିନ୍ ରାୱତଙ୍କ ମୃତ୍ୟୁ ପରଠାରୁ ସିଡିଏସ୍ ପଦ ଖାଲି ଅଛି । ଡିସେମ୍ବର ୨୦୨୧ରେ ହେଲିକପ୍ଟର ଦୁର୍ଘଟଣାରେ ତାଙ୍କର ମୃତ୍ୟୁ ହୋଇଥିଲା । ସେ ଦେଶର ପ୍ରଥମ ପ୍ରତିରକ୍ଷା କର୍ମଚାରୀଙ୍କ ମୁଖ୍ୟ ଥିଲେ ଏବଂ ତାଙ୍କ ମୃତ୍ୟୁ ପରେ ଏହି ପଦବୀକୁ ଅନ୍ୟ କାହାକୁ ଦିଆଯାଇ ନାହିଁ। ତେବେ ଜେନେରାଲ ରାୱତ ଡିସେମ୍ବର ୨୦୧୯ରେ ସେନା ମୁଖ୍ୟ ପଦରୁ ଅବସର ନେଇଥିଲେ ଏବଂ ସେ ୧ ଜାନୁୟାରୀ ୨୦୨୦ରେ CDS ଭାବରେ ଦାୟିତ୍ବ ଗ୍ରହଣ କରିଥିଲେ ।
Comments are closed.