ଭୁବନେଶ୍ୱର, ୨/୯: ଶିକ୍ଷା ଓ ଅନୁସନ୍ଧାନ (ସୋଆ)ର କ୍ୟାମ୍ପସ୍ରେ ସୋଆ ମୁନ୍ର ପଞ୍ଚମ ସଂସ୍କରଣ ଉଦ୍ଘାଟିତ ହୋଇଛି। ଏହି କାର୍ଯ୍ୟକ୍ରମରେ ୟୁକ୍ରେନ୍ ସମସ୍ୟା, ସାମାଜିକ ଜୀବନରେ ମହିଳାଙ୍କ ଭୂମିକା ଏବଂ ନିଶା କାରବାର ଭଳି ଗୁରୁତ୍ୱପୂର୍ଣ୍ଣ ପ୍ରସଙ୍ଗଗୁଡ଼ିକ ଆଲୋଚନା କରାଯିବ। ଶୁକ୍ରବାର ଆରମ୍ଭ ହୋଇଛି ୩ ଦିନିଆ ସୋଆ ଇଂଟରନ୍ୟାସ୍ନାଲ୍ ମଡେଲ୍ ୟୁନାଇଟେଡ୍ ନେସନ୍ସ (ସୋଆମୁନ୍) କାର୍ଯ୍ୟକ୍ରମରେ ଦେଶ ଏବଂ ବିଦେଶରୁ ପ୍ରାୟ ୫୦୦ ରୁ ଊର୍ଧ୍ବ ଛାତ୍ରଛାତ୍ରୀ ଭାଗ ନେଉଛନ୍ତି।
କାର୍ଯ୍ୟକ୍ରମର ଉଦ୍ଦେଶ୍ୟ ରହିଛି ଏକ କ୍ଷୁଦ୍ର ଅନୁକରଣ ମାଧ୍ୟମରେ ଜାତିସଂଘର ମହତ୍ୱକୁ ଛାତ୍ରଛାତ୍ରୀମାନଙ୍କ ନିକଟରେ ପହଂଚାଇବା। ସେହିପରି କୁଟନୀତି, ଆନ୍ତର୍ଜାତିକ ସମ୍ପର୍କ ଓ ଜାତିସଂଘ ସମ୍ପର୍କରେ ଛାତ୍ରଛାତ୍ରୀମାନେ ଯେଉଁଭଳି ଅଧିକ ଜ୍ଞାନ ଆହରଣ କରିପାରିବେ ତାହା ହିଁ ଏ କାର୍ଯ୍ୟକ୍ରମର ମୁଖ୍ୟ ଉଦ୍ଦେଶ୍ୟ ରହିଛି।
କାର୍ଯ୍ୟକ୍ରମର ଆୟୋଜକମାନେ କହିଛନ୍ତି, ଗଞ୍ଜେଇ ଭଳି ନିଶା ଦ୍ରବ୍ୟର ଡାକ୍ତରୀ ଏବଂ ବୈଜ୍ଞାନିକ ବ୍ୟବହାର ସହିତ ଏହାର ଅପବ୍ୟବହାରକୁ କିଭଳି ରୋକା ଯାଇପାରିବ ସେ ସମ୍ପର୍କରେ ଯେଉଁ ଅନ୍ତରାଷ୍ଟ୍ରୀୟ ଚୁକ୍ତି ରହିଛି, ସେ ସମ୍ପର୍କରେ ଆଲୋଚନା କରାଯିବ। ଏହା ସହ ସାମାଜିକ ଜୀବନରେ ମହିଳାଙ୍କର ଯୋଗଦାନ, ଲିଙ୍ଗ ଆଧାରିତ ହିଂସା ଏବଂ ୟୁକ୍ରେନ୍ ଉପରେ ରୁଷିଆର ଆକ୍ରମଣ ପରେ ଉଦ୍ଭବ ହୋଇଥିବା ସ୍ୱାସ୍ଥ୍ୟ ଜନିତ ପରିସ୍ଥିତିକୁ ଏଡ଼ାଇବା ଭଳି ପ୍ରସଙ୍ଗ ସମ୍ପର୍କରେ ଏହି ମୁନ୍ରେ ଆଲୋଚନା କରାଯିବ ବୋଲି ଆୟୋଜକମାନେ କହିଛନ୍ତି। ସେହିପରି ୟୁକ୍ରେନ୍ରେ କିଭଳି ଶାନ୍ତି ଫେରିଆସିବ ତାହା ନେଇ ଛାତ୍ର ପ୍ରତିନିଧିମାନେ ଏହି କାର୍ଯ୍ୟକ୍ରମରେ ଆଲୋଚନା କରିବେ ।
ଚଳିତ ବର୍ଷ ସୋଆ ମୁନ୍ରେ ୫ଟି କମିଟି ଗଠନ କରାଯାଇଛି। ଏହି କମିଟିଗୁଡ଼ିକ ହେଲା ୟୁଏନ୍ ଜେନେରାଲ୍ ଆସେମ୍ବଲି ଡିସ୍ଆର୍ମାମେଂଟ ଆଣ୍ଡ ଇନ୍ଟରନ୍ୟାସ୍ନାଲ୍ ସିକ୍ୟୁରିଟି କମିଟି (ୟୁଏନ୍ଜିଏ-ଡ଼ିଆଇଏସ୍ଇସି), ୱାର୍ଲ୍ଡ ହେଲ୍ଥ ଆସେମ୍ବଲି (ଡବ୍ଲୁଏଚ୍ଏ), ୟୁଏନ୍ କମିଶନ୍ ଅନ୍ ଦ ଷ୍ଟାଟ୍ସ୍ ଅଫ୍ ଓମେନ୍ (ୟୁଏନ୍ସିଏସ୍ଡବ୍ଲୁ), ୟୁଏନ୍ ଅଫିସ୍ ଅନ୍ ଡ୍ରଗ୍ସ ଆଣ୍ଡ କ୍ରାଇମ୍ (ୟୁଏନ୍ଓଡିସି) ଏବଂ ଇଂଟରନ୍ୟାସ୍ନାଲ୍ ପ୍ରେସ୍ (ଆଇପି)।
ଏହି କାର୍ଯ୍ୟକ୍ରମରେ ସୋଆର ଉପକୁଳପତି ପ୍ରଫେସର ପ୍ରଦୀପ୍ତ କୁମାର ନନ୍ଦ ମୁଖ୍ୟ ଅତିଥି ଭାବେ ଯୋଗ ଦେଇ କାର୍ଯ୍ୟକ୍ରମକୁ ଉଦ୍ଘାଟନ କରିଥିଲେ। ଏହି ସମୟରେ ସେ କହିଛନ୍ତି, ବିଶ୍ୱର ବିଭିନ୍ନ ସମସ୍ୟା ଏବଂ ଏହାର ସମାଧାନ ସମ୍ପର୍କରେ ଛାତ୍ରଛାତ୍ରୀମାନେ ବିତର୍କ କରିବା ଭବିଷ୍ୟତ ପାଇଁ ଖୁବ୍ ଲାଭଦାୟକ ବୋଲି କହିଥିଲେ। ବିଶ୍ୱ ବର୍ତମାନ ଅନେକ ସମସ୍ୟା ଦେଇ ଗତି କରୁଥିବା ବେଳେ ଜଳବାୟୁ ପରିବର୍ତନ ଏହା ମଧ୍ୟରୁ ସବୁଠାରୁ ବଡ଼ ସମସ୍ୟା ବୋଲି ସେ କହିଥିଲେ।
ସୋଆର ଛାତ୍ର ମଙ୍ଗଳ ଡିନ୍ ତଥା ସୋଆ ମୁନ୍ର କନ୍ଭେନର୍ ପ୍ରଫେସର ଜ୍ୟୋତି ରଞ୍ଜନ ଦାସ, କୋ-କନ୍ଭେନର ଡକ୍ଟର ସୌର୍ଯ୍ୟ ରଞ୍ଜନ ଦାସ, ସେକ୍ରେଟାରୀ ଜେନେରାଲ ଶ୍ରୀ ଶାଶ୍ୱତ ମହାପାତ୍ର ଏବଂ ଡାଇରେକ୍ଟର ଜେନେରାଲ୍ ଶ୍ରୀ ଉମାଶଙ୍କର ବିଶ୍ୱାଳ ପ୍ରମୁଖ ଏହି କାର୍ଯ୍ୟକ୍ରମରେ ବକ୍ତବ୍ୟ ରଖିଥିଲେ।
Comments are closed.