ନୂଆଦିଲ୍ଲୀ, ୧୭।୫: ନବୀନ ଶ୍ରୀବାସ୍ତବଙ୍କୁ ନେପାଳର ନୂତନ ରାଷ୍ଟ୍ରଦୂତ ଭାବରେ ନିଯୁକ୍ତ କରିଛନ୍ତି ଭାରତ ସରକାର। ସେ ବୈଦେଶିକ ମନ୍ତ୍ରଣାଳୟରେ ଅତିରିକ୍ତ ସଚିବ ଭାବରେ କାର୍ଯ୍ୟ କରୁଥିଲେ। ବୈଦେଶିକ ବ୍ୟାପାର ମନ୍ତ୍ରଣାଳୟରେ ପୂର୍ବ ଏସୀୟ ଦେଶଗୁଡ଼ିକର କାର୍ଯ୍ୟ ପରିଚାଳନା କରୁଥିଲେ। ଭାରତ ଓ ଚୀନ୍ ମଧ୍ୟରେ ୨୦୨୦ ରେ ହୋଇଥିବା ତିକ୍ତତାକୁ ନେଇ ସାମରିକ କଥାବାର୍ତ୍ତା କରିବା ଏବଂ ଉଭୟ ଦେଶରେ ତିକ୍ତତା ହ୍ରାସ କରିବାରେ ଏକ ବଡ଼ ଭୂମିକା ଗ୍ରହଣ କରିଥିଲେ ଶ୍ରୀ ଶ୍ରୀବାସ୍ତବ।
ପ୍ରଧାନମନ୍ତ୍ରୀଙ୍କ ନେପାଳଗସ୍ତ ପୂର୍ବରୁ ଭାରତ ଶ୍ରୀବାସ୍ତବଙ୍କ ନାମକୁ ରାଷ୍ଟ୍ରଦୂତ ଭାବରେ ପ୍ରସ୍ତାବ ଦେଇଥିଲା। ନେପାଳରେ ପ୍ରଧାନମନ୍ତ୍ରୀ ମୋଦୀ ତାଙ୍କ ପ୍ରତିପକ୍ଷ ଶେର ବାହାଦୂର ଦେଓବାଙ୍କୁ ଭେଟିଥିଲେ। ଦୁଇ ଦେଶ ମଧ୍ୟରେ ୪୯୦ ମେଗାୱାଟ ଜଳ ବିଦ୍ୟୁତ୍ ପ୍ରକଳ୍ପ ସହିତ ୬ଟି ଚୁକ୍ତିନାମା ସ୍ୱାକ୍ଷରିତ ହୋଇଛି।
ସୂଚନାଥାଉ କି, ଶ୍ରୀବାସ୍ତବ ବିନୟ କ୍ୱାଟ୍ରାଙ୍କ ସ୍ଥାନରେ ଅବସ୍ଥାପିତ ହେବେ। ଯେଉଁ ବିଭାଗରେ ଶ୍ରୀବାସ୍ତବ କାର୍ଯ୍ୟ କରିଥିଲେ, ତାହା ଚୀନ୍, ଜାପାନ, ଉତ୍ତର କୋରିଆ, ଦକ୍ଷିଣ କୋରିଆ ଏବଂ ମୋଙ୍ଗୋଲିଆ ସହିତ ଜଡ଼ିତ ଥିଲା। ଅନ୍ୟପକ୍ଷରେ, ନବୀନ ଶ୍ରୀବାସ୍ତବଙ୍କୁ ଚାଇନାରେ ଅଭିଜ୍ଞ ବୋଲି ବିବେଚନା କରାଯାଏ। ବର୍ତ୍ତମାନ ନେପାଳର ଅର୍ଥନୀତି ଏବଂ ରାଜନୀତିରେ ଚୀନ୍ ଏହାର ପ୍ରଭାବ ବଢ଼ାଇବାକୁ ଚେଷ୍ଟା କରୁଛି। ଏଭଳି ପରିସ୍ଥିତିରେ ନେପାଳରେ ନବୀନ ଶ୍ରୀବାସ୍ତବଙ୍କ ଭୂମିକା ମଧ୍ୟ ଗୁରୁତ୍ୱପୂର୍ଣ୍ଣ ହୋଇପାରେ।
Comments are closed.