ୱାସିଂଟନ, ୨୦/୮: ମେଲାନୋମା ପରି ଗୁରୁତର ଚର୍ମ କ୍ୟାନ୍ସର ଚିକିତ୍ସା କ୍ଷେତ୍ରରେ ନୂଆ ଆଶା ସୃଷ୍ଟି ହୋଇଛି। ମଡର୍ନା ଓ ମର୍କ ମିଳିତ ଭାବେ ବିକଶିତ କରୁଥିବା ବ୍ୟକ୍ତିଗତ ଏମ୍ଆର୍ଏନ୍ଏ କ୍ୟାନ୍ସର ଟିକା ‘ଇଣ୍ଟିସ୍ମେରାନ୍ ଅଟୋଜିନ୍’ (ଅନ୍ୟନାମ ଭି୯୪୦ ଏବଂ ଏମ୍ଆର୍ଏନ୍ଏ-୪୧୫୭) ତୃତୀୟ ପର୍ଯ୍ୟାୟ ପରୀକ୍ଷଣରେ ଗୁରୁତ୍ୱପୂର୍ଣ୍ଣ ଲକ୍ଷ୍ୟ ହାସଲ କରିଛି। ଅସ୍ତ୍ରୋପଚାର ପରେ ଉଚ୍ଚ ବିପଦପୂର୍ଣ୍ଣ ମେଲାନୋମା ରୋଗୀଙ୍କଠାରେ କ୍ୟାନ୍ସର ପୁଣି ଫେରିବା ଓ ଶରୀରର ଅନ୍ୟ ଅଂଶକୁ ବ୍ୟାପିବାକୁ ରୋକିବାରେ ଏହି ଟିକା ଆଶାଜନକ ଫଳ ଦେଇଛି। ଦୁଇ କମ୍ପାନୀ ଗୁରୁବାର ଏହି ଫଳାଫଳ ଘୋଷଣା କରିଥିଲେ।
ଏହି ତୃତୀୟ ପର୍ଯ୍ୟାୟ ‘ଇଣ୍ଟରପାଥ୍-୦୦୧’ ପରୀକ୍ଷଣରେ ସମ୍ପୂର୍ଣ୍ଣ ଅସ୍ତ୍ରୋପଚାର ହୋଇଥିବା ଷ୍ଟେଜ୍ ୨ବିରୁ ଷ୍ଟେଜ୍ ୪ ମେଲାନୋମାର ୧,୧୩୭ ଜଣ ରୋଗୀଙ୍କୁ ସାମିଲ କରାଯାଇଥିଲା। ରୋଗୀଙ୍କୁ ଦୁଇ ଦଳରେ ବିଭକ୍ତ କରି ଗୋଟିଏ ଦଳକୁ ଇଣ୍ଟିସ୍ମେରାନ୍ ସହ ମର୍କର ଇମ୍ୟୁନୋଥେରାପି ଔଷଧ ପେମ୍ବ୍ରୋଲିଜୁମାବ୍ ଦିଆଯାଇଥିଲା। ଅନ୍ୟ ଦଳକୁ କେବଳ ପେମ୍ବ୍ରୋଲିଜୁମାବ୍ ଦିଆଯାଇଥିଲା। ଟିକା ସହ ଔଷଧ ନେଇଥିବା ଦଳରେ କ୍ୟାନ୍ସର ଫେରିବା ପୂର୍ବରୁ ରୋଗୀମାନେ ଅଧିକ ସମୟ ସୁସ୍ଥ ରହିଥିଲେ। ଦୂର ଅଙ୍ଗକୁ କ୍ୟାନ୍ସର ବ୍ୟାପିବା ରୋକିବାରେ ମଧ୍ୟ ଉନ୍ନତି ଦେଖାଯାଇଛି।
ଏହି ଟିକା ସାଧାରଣ ପ୍ରତିଷେଧକ ଟିକା ଭଳି ନୁହେଁ। ଏହା ରୋଗ ହେବା ପୂର୍ବରୁ କ୍ୟାନ୍ସରକୁ ରୋକିବା ପାଇଁ ଦିଆଯାଉଥିବା ଟିକା ନୁହେଁ; ବରଂ କ୍ୟାନ୍ସର ଚିକିତ୍ସାର ଏକ ନୂଆ ପଦ୍ଧତି। ରୋଗୀଙ୍କ ଟ୍ୟୁମରର ଜିନ୍ଗତ ଗଠନ ପରୀକ୍ଷା କରି ସେଥିରେ ଥିବା ନିର୍ଦ୍ଦିଷ୍ଟ ପରିବର୍ତ୍ତନ ଚିହ୍ନଟ କରାଯାଏ। ଏହି ପରିବର୍ତ୍ତନରୁ ତିଆରି ହେଉଥିବା ‘ନିଓଆଣ୍ଟିଜେନ୍’କୁ ଲକ୍ଷ୍ୟ କରି ପ୍ରତ୍ୟେକ ରୋଗୀଙ୍କ ପାଇଁ ଅଲଗା ଏମ୍ଆର୍ଏନ୍ଏ ଟିକା ପ୍ରସ୍ତୁତ କରାଯାଏ। ଏହା ଶରୀରର ପ୍ରତିରୋଧକ ତନ୍ତ୍ରର ଟି-ସେଲ୍କୁ କ୍ୟାନ୍ସର କୋଷ ଚିହ୍ନିବା ଓ ତାହା ବିରୋଧରେ ଲଢ଼ିବାକୁ ପ୍ରସ୍ତୁତ କରେ। ଏହି ପଦ୍ଧତିର ବିଶେଷତ୍ୱ ହେଉଛି ଏହା ‘ଗୋଟିଏ ଟିକା ସମସ୍ତଙ୍କ ପାଇଁ’ ନୁହେଁ। ରୋଗୀଙ୍କ ନିଜ ଟ୍ୟୁମରର ଗୁଣ ଅନୁଯାୟୀ ଏହାକୁ ପ୍ରସ୍ତୁତ କରାଯାଏ। ଏହା ପୂର୍ବରୁ ୨୦୨୬ରେ ପ୍ରକାଶିତ ଫଲୋ-ଅପ୍ ତଥ୍ୟରେ ୧୫୭ ଜଣ ଉଚ୍ଚ ବିପଦପୂର୍ଣ୍ଣ ମେଲାନୋମା ରୋଗୀଙ୍କ ଉପରେ ହୋଇଥିବା ଦ୍ୱିତୀୟ ପର୍ଯ୍ୟାୟ ପରୀକ୍ଷଣରେ ମଧ୍ୟ ଆଶାଜନକ ଫଳ ମିଳିଥିଲା। ତେବେ ଏହି ଟିକା ଏବେ ସାଧାରଣ ରୋଗୀଙ୍କ ପାଇଁ ଉପଲବ୍ଧ ନୁହେଁ। ତୃତୀୟ ପର୍ଯ୍ୟାୟ ପରୀକ୍ଷଣର ଫଳାଫଳ ମିଳିଥିବାରୁ ଏହା ଏକ ବଡ଼ ସଫଳତା ହୋଇଥିଲେ ମଧ୍ୟ ନିୟାମକ ସଂସ୍ଥାର ଅନୁମୋଦନ ଏବେ ବାକି ରହିଛି।
Comments are closed.