୨୫ କୋଟି ଜୋରିମାନା ଭରିବ ବେଦାନ୍ତ କମ୍ପାନୀ

ଭୁବନେଶ୍ବର, ୬।୬: କଳାହାଣ୍ଡି ଜିଲ୍ଲାର ଲାଞ୍ଜିଗଡ଼ସ୍ଥିତ ଆଲୁମିନା ରିଫାଇନାରୀ ଓ କ୍ୟାପଟିଭ୍ ପ୍ଲାଣ୍ଟ ସମ୍ପ୍ରସାରଣରେ ପରିବେଶ ଆଇନ ଉଲ୍ଲଘଂନ କରିଥିବା ଅଭିଯୋଗରେ ବେଦାନ୍ତ କମ୍ପାନୀକୁ ୨୫ କୋଟି ଟଙ୍କା ଜୋରିମାନା ଦେବା ପାଇଁ ଜାତୀୟ ଗ୍ରୀନ୍ ଟ୍ରିବ୍ୟୁନାଲ(ଏନଜିଟି) ନିର୍ଦ୍ଦେଶ ଦେଇଛନ୍ତି।

ଏନଜିଟି ଅଧ୍ୟକ୍ଷ ଆଦର୍ଶ କୁମାର ଗୋଏଲଙ୍କ ସ୍ୱତନ୍ତ୍ର ଖଣ୍ଡପୀଠ ବେଦାନ୍ତ ଲିମିଟେଡକୁ ୨୦୧୫ ନଭେମ୍ବର ୨୦ତାରିଖରେ ମିଳିଥିବା ପରିବେଶ ଅନୁମତି ବିରୁଦ୍ଧରେ ଆଗତ ଏକ ଆବେଦନର ଶୁଣାଣି କରି ମେ’ ମାସ ୨ତାରିଖରେ ଏହି ନିର୍ଦ୍ଦେଶ ଦେଇଛନ୍ତି । ଗ୍ରୀନ ଟ୍ରିବ୍ୟୁନାଲଙ୍କ ଖଣ୍ଡପୀଠ ତାଙ୍କ ନିର୍ଦ୍ଦେଶରେ କହିଛନ୍ତି ଯେ, କମ୍ପାନୀ ବେଆଇନ ଭାବେ ତା’ର ସମ୍ପ୍ରସାରଣ କରିଛି । ତେଣୁ ପରିବେଶ ଆଇନର ଖୋଲା ଉଲ୍ଲଘଂନ କରିଥିବାରୁ ୨୫କୋଟି ଟଙ୍କାର କ୍ଷତିପୂରଣ ଧାର୍ଯ୍ୟ କରାଯାଇଛି । ପରବର୍ତ୍ତୀ ସମୟରେ ପରିବେଶ ଯୋଜନା ପ୍ରସ୍ତୁତ ଓ ତାକୁ କାର୍ଯ୍ୟକାରୀ ନିମନ୍ତେ ନିର୍ଦ୍ଦେଶ ଦେବେ ବୋଲି ଗ୍ରୀନ୍ ଟ୍ରିବ୍ୟୁନାଲ ତାଙ୍କ ରାୟରେ କହିଛନ୍ତି । ଏହି ୨୫କୋଟି ଟଙ୍କାକୁ ମାସକ ମଧ୍ୟରେ ଓଡ଼ିଶା ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡ ପାଖରେ ଜମା କରିବା ପାଇଁ କମ୍ପାନୀକୁ ନିର୍ଦ୍ଦେଶ ଦିଆଯାଇଛି । ଏହି ଟଙ୍କାକୁ ଏକ ସ୍ୱତନ୍ତ୍ର ଆକାଉଣ୍ଟରେ ରଖାଯିବ, ଯାହାକି ପରିବେଶ ପ୍ରଦୂଷଣକୁ ରୋକିବା ଦିଗରେ ଖର୍ଚ୍ଚ କରାଯିବ କରାଯିବ ବୋଲି ଟ୍ରିବ୍ୟୁନାଲ କହିଛନ୍ତି ।

କମ୍ପାନୀ ପକ୍ଷରୁ ଯୁକ୍ତି ଦର୍ଶାଯାଇଥିଲା ଯେ, ୫୦ହଜାର କୋଟି ଟଙ୍କାର ନିବେଶ କରାଯାଇଛି । ପରିବେଶ ସୁରକ୍ଷା ପାଇଁ ସବୁ ପ୍ରକାରର ପଦକ୍ଷେପ କମ୍ପାନୀ ନେଇଛି । ପ୍ରକଳ୍ପ ପାଇଁ ଆବଶ୍ୟକ ସମସ୍ତ ସାମ୍ବିଧାନିକ ଅନୁମତି ମଧ୍ୟ କମ୍ପାନୀ ହାସଲ କରିଛି । କିନ୍ତୁ ଗ୍ରୀନ୍ ଟ୍ରିବ୍ୟୁନାଲଙ୍କ ଖଣ୍ଡପୀଠ କମ୍ପାନୀର ଏହି ଯୁକ୍ତିକୁ ଗ୍ରହଣ କରିନଥିଲେ । କେନ୍ଦ୍ର ପରିବେଶ ଓ ଜଙ୍ଗଲ ମନ୍ତ୍ରଣାଳୟଠାରୁ ପରିବେଶ ଅନୁମତି ନଆଣି କମ୍ପାନୀ ଆଂଶିକ ସମ୍ପ୍ରସାରଣ କାର୍ଯ୍ୟ କରି ଆଇନର ଉଲ୍ଲଘଂନ କରିଥିବା ଗ୍ରୀନ୍ ଟ୍ରିବ୍ୟୁନାଲ କହିଛନ୍ତି । ସେହିପରି ତେଲ ନଦୀରୁ କମ୍ପାନୀ ଦ୍ୱାରା ଜଳ ଉପଯୋଗ କରାଯିବା ଉପରେ ମଧ୍ୟ ଏନଜିଟି ଆପତ୍ତି ଉଠାଇଛନ୍ତି । ନଦୀରୁ ଜଳ ଉପଯୋଗ କରିବାକୁ ନେଇ ଏହାର ପ୍ରଭାବକୁ ଆକଳନ କରାଯିବା ଓ ନଦୀର ସୁରକ୍ଷା ପାଇଁ ଅତିରିକ୍ତ ସର୍ତ୍ତାବଳୀ ରହିବା ସପକ୍ଷରେ ଟ୍ରିବ୍ୟୁନାଲ ମତ ଦେଇଛନ୍ତି ।

ଏହାସହିତ ଗ୍ରୀନ ଟ୍ରିବ୍ୟୁନାଲ ମଧ୍ୟ ଏନେଇ ଏକ କମିଟି ଗଠନ କରିଛନ୍ତି । କମିଟିରେ ଓଡ଼ିଶା ଜଳସମ୍ପଦ ସଚିବ, କେନ୍ଦ୍ରୀୟ ଜଳ ଆୟୋଗ, ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡ, ପରିବେଶ ଓ ଜଙ୍ଗଲ ମନ୍ତ୍ରଣାଳୟର ଆଂଚଳିକ କାର୍ଯ୍ୟାଳୟକୁ ଏହି କମିଟିରେ ସାମିଲ କରାଯାଇଛି । ବେଦାନ୍ତ କମ୍ପାନୀ ଉପଯୋଗ କରୁଥିବା ଜଳ ଯୋଗୁ ନଦୀ ଉପରେ ପଡ଼ୁଥିବା ପ୍ରଭାବର ଆକଳନ କରିବା ଓ ଅତିରିକ୍ତ ସର୍ତ୍ତାବଳୀ ପ୍ରସ୍ତୁତ କରିବା ପାଇଁ ଏହି କମିଟିକୁ ଗ୍ରୀନ ଟ୍ରିବ୍ୟୁନାଲ ନିର୍ଦ୍ଦେଶ ଦେଇଛନ୍ତି ।